Kia Ora aus Neuseeland

Einen wunderschoenen guten Tag allerseits - di erste anderhalb Wuche in NZ si scho duere u ues gits praechtig!

Mier hi due no in Auckland es Auto (sone Minivan mit Bett hindedrinne) kuuft u si nun sitere Wuche unterwegs u ig (Chanti) bi HELLBEGEISTERT (Steff ja sowieso, das himer ja scho gwuesst gha hihi) vo dere wahnsinig schoene Natur, dene geniale Farbe u dere Vielsitigkiit....
Mier hi ja ir Schwiz o es wunderschoens Gruen u ueser Faelder si o e Fall fuer sich, aber hie.... also uh schoen!!!

Uesi ersti Fahrt mit uesem (igete) Auto isch Richtung Raglan gange, herzigs Surferstedtli aber womer si usgstige het ues fasch dr Schlag troffe, es isch richtig CHALT gsi (im Verglich zu de vergangene Wuche) u o am naechste Tag ischs no net wuerklich summerlich gsi, aber glich uh zfride u wunderschoen. Mier si naer witergfahre bi paar Ussichtspuenkt aka Wasserfaell verbi (sensationell) u naer schlussendlich in Waitamo glandet, wo mier e Nachtwanderig hi gmacht u duer chlini Caves (so Schluchte) si u huuunderti vo Gluehwuermli hi gseh - uuuh schoen :)

Leider isch uese Tag minim truebt worde, da ues e Duetsche (jaaa, der Deutsche wars) sitwerts i Chare isch gfahre (mier hi ues gfragt wie, er isch vo sim Parkfeld quer ueber di ganzi Strass sitwerts i ueses ufer andere Strassesite parkierte Auto gfahre... what the hell..) u jetz simer stolzi Bsitzer vore riesige Beule, aber es fehrt no u somit simer igentlich im Grosse u Ganze no heil drvo cho.
Sini Versicherig soett jitz uesi Reparatur zahle, aber das dauert Jahre u mier sis immer no am abklaere....
Kommt Zeit, kommt Rat :)

Z Wetter isch abem 3 Tag super gsi - schoen warm (heiss) u mier si mittlerwile scho zum zweite Mal in Mount Maunganui (dert wo Chaefer sini Sprachschuel vor 5 Jahr het gmacht) u es isch wunderschoen u riiese haerzig hie - hier koennte man bleiben... u gniesse z Bier, dr Strand u d' Churzwanderige hie. Carsen, dr neuseelaendisch Kolleg vo Stef, himer no bsuecht u paar Taegli mit ihm verbraecht u de chunt iz de hinecht o ume uf Mount fuernes Bierli, zwue :)
Zwuesche dene zwene Abstecher in Mount M. simer no uf Coromandel gfahre, wunderschoeni Kuesteabschnitte mit riese schoene gruene Wiesene direkt ar Klippe, unberuehrti Natur u ifach unbeschriblich farbig u irgendwie scho es bitz magisch..

Ah, ein weiterer Input an dieser Stelle - ues het z Fischerfieber packt!!
Mier hi e (billigi Supermarkt-) Ruete kuuft, Koeder, Zaepfe, Gwicht u Haeege u si jitz putzmunter fasch taeglich am Fische :) faegt also schampaar u werde mier hoechstwahrschinlich o ir Schwiz witerzieh (das heisst Patent loesen!!) Bilanz vode gfangige Fische isch no ned so rosig, aber het emel mal fuernes Znacht glaengt u mier si positiv igstellt, dass mier doch no dr int oder ander werde faah :)

Alors, mier goeh naer mal e Rundi Fish + Chips (yummi) ga aesse u maelde ues sicher gli gli gli gli umi!
Hoffe, bi euch isch alles OK u dr Schnee sig wiss u schoen u ier gniesset di warme Stunde vorem Cheminee oder bimene warme Tassli Gluehwein!

Mier denke fescht a euch u gruesse euch usem wuerklich wahnsinnig schoene "anderen Ende der Welt"

Chaefer & Schnugi**