Zum anschauen.. looking good part 2

Ledge-Bungy ueber Queenstown (Chaefer)

Mt. Roy... zum Schreien schoen....

.... in Wanaka

Milford Sounds (Fjordland)

Beginn Kepler Track....

Kepler Track... 4 Taeg ueber Kretene....

zu Seeli......

duer Zouberwaeldli....

Zouberwald Teil 2., komisch aber so schoen!!

Zouberwald i Gruen

ifach e schoene See

Komisch aber schoen Teil 2

Sonnenuntergang am 3te Abe bim Kepler Track

Zum anschauen... looking good :)

Ussicht Abel Tasman Walk

Ussicht Nr. 2

Ussicht uf Chaefer :)

Westcoast.. Waeschekunstwerk - Alls us Holz!!

Uee.. es faegt!

Sandflies, Hoehenfluege, Adrenalin und Muskelkater

Hello erstmal und herzlichen Dank fuer eure Geduld - mier hi doch scho es Zitli nueme i Blog gschribe aber es isch soo schoen da, da bleibt einem einfach fasch keine Zeit :)

Nach uesem letschte Itrag himer due ds Englenderpaaerli troffe u mit dene e super Abe verbracht - isch aecht zfriede gsi. Am naechste Tag hi mier ues (bi purem Sonnenschein) witer Richtig Abel Tasman Nationalpark gmacht u si dert zwe, drei Taeg blibe.
Es isch aecht schoen gsi, am zweite Taegli ha ig (Chanti) e 6-stuendegi Rundwanderig duere Nationalpark gmacht, zersch duere Wald (ufwerts), naer ade verschidene Goldstrend zrueg, jede mit wunderbare Panoramablicke (uuh schoen!!!) Chaefer isch vor andere Site entgaegeglueffe, mit Fischerrute u Proviant, u het dert amene Strendli uf mi gwartet :) Di letschte zwe Stund simer due no zaeme zrueg glueffe u hi dr Taeg mit feinem Grillen u Bierli la usklinge. Uebringens.. z Waetter isch super gsi! Ou ja, sogar e Mantaroche hi mer am Strand no gseh - das isch scho ifach fasch biz Zuviel des Guten :)

Nach dene wunderschoene Taegli simer vomene Hippidoerfli (Takaka) ad Westkueste gfahre u vo dert us naer langsam nitzig. Gevotet als eine der zehn schoensten Routen der Welt u ja, es isch ifach uh schoen u mier wuesse scho fasch nueme, was drzue z saege ussert: MIER GNIESSES U ES ISCH DR HAMMER!
Z Waetter het igentlich ging mitgspielt u nach paar chline Churzwanderige zude Gletscher oder a Fluessli simer schlussendlich in Wanaka acho.
Uh haerzigs Stedtli mit nomene schoenere See u ere praechtige Ussicht uf d Berge (aecht no es Muue besser als ir Schwiz hihi).
Mier hi ues due ids Fudi klemmt u e 5-6-Stuendige, sehr stotzige Walk ufe Mt. Roy i Agriff gnoh, wo wunderbari Ussicht uf di ganzi Wanaka-Kulisse het versproche.
I (Chanti) bi fasch drauf, aber es het sich meh als glohnt.. (siehe Foto) u mier hi ues vo dere Ussicht chum erholt.
A propos: am naechste Tag hi mier beidi also Muskelkater gha!!! :)

Weiters isches naer Richtig Queenstown - die Hauptstadt der Extremsportarten..... Klar hi mier da ono oepis muesse mache - mae wird dert fasch drzue zwunge (hihi) u mier muesse saege - BUNGY - JUMPING ISCH SUPER u definitiv e extreme Adrenalinschueb.....
Chaefer het am erste, ig am zweite Tag. Absolut fantastisch u ifach empfaehlenswert (chame net beschribe - man muss schon selber springen!!)
Queenstown saelber isch rein optisch bitz wi Interlake - mir hi ues fasch chli Daheime gfuehlt :) u no e witere Pluspunkt - die besten Burger der Welt gibt's hier - Huusgmacht, so gross wines Gsicht u so fein wi ke andere. Wahnsinn (hi gad 2 bstellt!) Und wie bisher.. das Wetter ist super!

Nach 3 sehr coole Taegli z Queenstown simer uf Te Anau (Fjordland) gfahre u hi ues ganz er Schoenhiit vode Fjorde gwidmet - zersch mitere Bootstour im Milford Sound und di folgende 4 Taegli naer mit Luufe...

Laufen... 62km... Kepler Track.....
4 Tage im Fjordland.... alls himer muesse mitnaeh, Chleider, Schlafsack, Aesse, Trinke, Pfanne, Taeller, Bsteck... u das gwichtet... mit Sack und Pack himer dr erst Taeg bi bewoelktem Waetter i Agriff gnoh - praktisch nueme Ufwerts isches... aber mir si uh schnell gsi u his gar net so streng gfunde. D Ussicht am erste Abe isch e Katastrophe gsi - nume Wolke u extrem dichte Naebel, aber mir hi es haerzigs Huesli gha (extrem CHALT!!! KEINE HEIZUNG IN DEN SCHLAFSAEELEN!!!) u e zfridnige Abe dert verbracht.
Am zweite Tag... dr absolut Wahnsinnstag... z schoenst Waetter, di strengsti Wanderig.. di besti Ussicht.... eine Pracht.. ueber die Bergketten des Fjordlands.. verschideni Ussichte doerfe gniesse u am Schluss no z Loch ab duere Wald.. u we mier saege Wald, de isches gruen... sooo schoen gruen!!
Mier hi z Maerliland gfunde!!!!!
Am dritte Taegli isches meh oder weniger grad (16 km) duere "Zouberwald" witer zum naechste Huesli am See. See = schoen aber leider si di doofe Sandflies u Mugge dert... grrr!!
Da's keni Duschene het (waehrend dr ganze Wanderig), isch e See doch sehr praktisch u erfrischend!

Der letzte Tag... 15.5 km bis zum Auto.....
Meine (Chanti) Beine...... Gummi.... i ha aecht muesse kaempfe.. uh schoen.. aber scho chli mued bini gsi!  Chaefer het sich da scho besser gschlage - dae het waeder Muskelkater no suesch oepis gspuert u miner Oberschenkle u Wadli... ooh.... Schmerz!
ABER: Stolz u henne zfride u extrem mued si mier bi uesem Auto acho, nach 4 Taegli im Nirgendwo in Fjordland... wunderschen ischs gsi!
U zur Belohnig simer e feini, frischi Pizza ga esse u es Bierli ga ha! Het gfaegt, nach 4 Taegli ifach choene z hocke u es Bierli z naeh!

Soo u jitz simer da scho im Suede... fahre langsam Richtig Dunedin ad Ostkueste duere. Di naechste Taegli waerde mier alwe ned so aktiv si - meh fahre u d Ussicht gniesse....dr naechst Walk (Wanderig!) stiit am 1. Maerz vor dr Tuere.. bim groeschte Berg vo Neuseeland.. Mt. Cook.

Mier hoffe, dases euch allne super git u euch dr Winter doch ned allzu fescht im Griff het (mir hi gseh.. es isch uh chalt - ihr habt unser Bedauern!)??
Denke fescht a euch u schickenech es gruens Muentschi usem unbeschribliche Neuseeland, wo ues jede Tag neui Facettene ziigt u ues jede Tag uf z Neue leht la begeistere!!!!!

Es riese Bisous**** vo eune Hobbits us Neuseeland :)

Das Auge liest mit...

Space am Grillen!!! (dae Cheib isch 50gi!)

Ufem Mt. Maunganui mit Karson

Frische Fische + Chips am letschte Abe in Mount

(Karson, Chaefer, Space, Lindon u Delanie)

Craters of the moon... very nice :)

Uf dae Cheib.... simer mit Muehe und Not - aber mir si druf!

Chaefer beim Aufstieg...

Chanti on the top

The capital city of New Zealand - Wellington

Das Beste zum Schluss: MEINE FUESSE nach dem Tongo Walk

Tongariro Alpine Crossing u suesch no zuegs :)

Unsere lieben Freunde der Sonne, so, der Nachtrag zu de bereits ufgladene Fotos plus zu de zwueschezitliche Erlaebnis si faellig u de gaebe mier euch o:

Nach uesere wunderschoene Reis uf Coromandel simer no is chli z Mt. Maunganui blibe hange u hi no Space, Steffs "alte" Kolleg vor letschte Reis (ae richtige Maori!) bsuecht, Carson (dr ander Neuseelaender) isch ono mit vor Partei gsi u das isch fuer ues unvergesslich, hi schlussendlich 4 Naecht bi ihm u sire Fruendin choene uebernachte u jede Abe grillet u chli Wii u Bier gha, si ids Stedtli, ga Fische u his ifach henne zfride gha. U sehr sehr lustig!!!

Wo mier due Mt. Maunganui (etwas schweren Herzens) hi verlah, simer witers richtig Rotorua (aehnlich wi dr Yellowstone NP i de Staate) u dert ir Nechi himer no e Kurzwanderig ufene Ussichtspunkt gmacht, wunderschoen ueber di ganzi Landschaft himer choene blicke... super gsi!
Mier si am gliche Abe naer no Richtig Taupo gfahre, mit der Abendsonne im Gesicht (uh schoeni Strecki gsi) u si am naechste Tag no zu de "Craters of the Moon" - e Sumpf- u Dampflandschaft, uesserscht attraktiv :) u wuenderschoen zum duereluufe (siehe Bild!)

Mier si dert due uese Transport fuers Tongariro Alpine Crossing fuer am naechste Tag ga bueche. Leider isch ned z ganze Crossing offe (vo Weste nach Norde) sondern nume dr Halb (bis zu dene wuenderschoene Seeleni, Emerald Lakes, uf de Fotos) u naer ume retour, wills dert im November e Vulkanusbruch het gaeh us ging no usem Berg use rouchnet.
Ufgrund desse hi mier ues entschide, zueaetzlich, dases fuer Chaefer doch ono mal chli spannend wird (aer het das Crossing ja scho vor 5 Jahr gmacht gha), dr Mt. Ngauruhoe z bestige.
Ds isch dr Berg, vome vom Film "Herr der Ringe" kennt - da wo das maechtige Auge druff obe isch.
Das hisst, dasmer zersch 3 Stund grad u ufwerts bis zu de Emerald Lakes glueffe si, naer e halb Stund retour, u ner gefuehlte 10 Stund uf de cheibe Gipfel vo dem Mordsvulkan Mt. Ngauruhoe (in Mordor).
Churz gsit, mier si beidi fasch drauf ds isch abartig astrengend gsi - s het waeder e Weg no annehernd e begehbari Strecki gha, me het ifach wild muesse druf los chlettere u steiler isches ono ging worde.
Drfuer isch d Belohnig, weme obe achunt, grandios... wunderschoens Gfuehl, wemes gschafft het (mier si also scho es bitzi stolz uf ues!) u d Ussicht isch also o ned z verachte! :)
Fuer mig (Chanti) het sich z Blatt naer no gwendet, i wer also lieber 5 Mal ueche glueffe u NIE ache, das isch dr Horror gsi fuer mig ueber di cheibe Steine ohni Weg, u Chaefer isch ganz leger achegrutscht als hetti er nie oepis anders gmacht! U ig ha muesse kaempfe (siehe Fussfoto) - aber mier wettes beidi nie misse, isch e wunderschoeni Erfahrig u e wunderbare Hike gsi!
(Nicole, hesch gseh, wasi fuer Schueh ha anne gha fuer de total 9-stuendig Hike? :) )
Muede aber zfride hi mer ues am Abe es warms Dueschi u paar Bierli goennt :)

Dr Tag druf simer am Whanganui - River entlang Richtig Suede gfahre - erste Tag super Wetter u di zwe druf folgende si leider net so rosig gsi, isch aber ok de himer chli choenne Autofahre (hi leider dr int Berg, womer hi wele ga agugge, GAR NET gseh, isch so liid Wetter gsi) u si mittlerwile scho ufer Suedinsle acho, nach 3 super Taegli ir Huptstadt Wellington (Fische, Esse, Bierli und und und).

Huet traeffe mier no es Paaerli vo England, wo mier uf de Fiji's hi lehre kenne - wird sicher lustig - u Morn goeh mier naer witers, Richtig nechsti Wanderig im Abel Tasman Park, halb zu Fuss, halb mit Kayak - freue ues schampaar.

Sooo, maelde ues sicher gli gli ume u hoffe, euch goengs allne guet u es waerdi doch langsam de ume is chli speter dunkel :)
(hie isch super, bis am halbi 10 isch hell!)

Mier denke fescht anech u hi euch uuh gern! E riese Muntsch usem haerzige Stedtli Nelson vo

Steff, Ruegs, Globi + Chanti, Schnugg, Schaentu

Ohne Worte....

Auf dem Weg.....

Etwas weiter oben.....

Beautiful Emerald Lakes

Chaefer on the top!!!!!

Uf de cheibe Baerg im Hintergrund (der groessere - siehe links) simer uechi!!