Helloo ueser Allerliebste - hoffe, euch goengs allne super?
Mier hi d Sunne wahrschinlich wuerklich gad chli zu frueh (fuer ues!) id Schwiz gschickt, mir si sit 2 Wuche z Kambodscha u jitz begriife mier o, werum dass die Zit als "Regenzeit" benannt isch: sit 5 Taeg schiffets... und unsere wunderschoen gewonnene Braeune schwindet :(
Aber git ja schliesslich schlimmers :)
Mier hi 5 wunderbari Taegli in Bangkok verbracht (findes super dert, di legendaeri Khao San Road mit Insekte zum vernasche, Maerit, gmuetlichi Beizli u feini Drinks, Bierli etc) u hi ues naer via Bus uf Kambodscha begaeh.
D Reis ansich isch tip top gsi, uese Fahrer het d Bremse nume saelte brucht u somit simer no fasch chli frueher ar Grenze gsi als erwartet. Also ja, churz vor dr Grenze... zum Glueck hi mier vorher vernoh, dass me ar kambodschanische Grenze, weme vo Thailand us ireist, mues ufpasse... Abzocke..... u jaaa.... mier hi de 2 suprigi Bispiil aber mier hi uf uesem Wunsch, direkt ad Grenze z fahre, beharrt, o we si ues di ganz Zit brandschwarz hi agloge (es het zue, dr Visaatrag chame nume hie ireiche, dr Priis isch ging so viel.. etc) u si drfuer miteme regulaere 20 USD-Visa belohnt worde.
Direkt vor Grenze simer uf Siem Riep, wome ds groeschte religioese Gebilde vor ganze Waelt cha ga beguetachte u genau das himer am druffolgende Taegli o gmacht. Sehr sehr idruecklich u wuerklich riesig, u super fuernes Taegli, werum aber tiil Luet dert e Wuche choene umehulanere verstoeh mier zwue no net so ganz aber isch ja schliesslich jedem das Seine, wahrschinlich isch das genau z Richtige fuer Tempelfanatiker :)
Mier si no so Doerfli, ufbuut uf Staelze (waegem Wasser ir Raegezit) ga bsueche (di Luet hi wuerklich zum Tiil gar nix...es Huus us schitterem Holz u es Blaechdach) u hi erneut e Platte gha, das wer scho dr 3 u das ide letschte 2 Monet - was fuer eine Bilanz? :)
Nachdem simer gad mitem Nachtbus direkt uf Sianoukville gfahre - DER BADEORT vo Kambodscha u ja, es isch henne zfride u wahnsinnig relaxed hie, o we dr Strand niie und nimmer mit Thailands Insle oder Indonesie cha mithalte. Wir finden's trotzdem toll da!
D Gschicht vode Kambodschaner isch sehr praegend u idruecklich (also vorwiegend wuesse mier chli Bschid ueber d Zit sit 1970) u d Nachwirkige vo daem verherende Chrieg im 75 - 79 gseh mier praktisch ueberall no chli, ned landschaftlich, aber a de Luet... Niene suesch himer so viel behindereti Mensche gseh, vor allem gad ide Touristeplaetz oder ir Nechi vom Strand hets elends viel vorwiegend Maenner ohni Bii oder ohni Arm etc. Di baettle ununterbroche, u mae cha ifach o ned jedem oepis gaeh u mengisch isch das uh hert fuer ues, oder sogar chli laestig wesi di am gliche Tag 4x choeme cho frage - du gsehsch ihres Elend, aber chasch/wosch ja o ned jedem einzelne oepis spende.
U ja, der endlose Regen... mier choene ja ned chlage, ned im gringste, nach uesne super 9 Monet vorher choene mier o chli Regen ertrage u ehrlich gsit macht's ues dr Abschied vom Usland vilich o chli liechter :)
Gniesses glich enorm da, z Essen isch dr Hammer u d Stimmig isch o voellig ausgelassen, drum choste mier ueser letschte Taegli no is richtig us, aber gfreue ues schampaaaar uf euch!!!
E fette Muntsch usem verraegnete Sianoukville (mit feine Mojitos u guenstigem Bier!)
Chaefi + Schnugi
